( تاج ) اهم 6 اسرار فى حياتي …
أضيف بواسطة Hawyphp في قسم Tags, Personal
السلام عليكوووووو ،،، اخباركوا والله ليكوا وحشة والمدونة ليها وحشة والدنيا كلها ليها وحشة
طيب التدوينة دي بقالها فترة المفروض انزلها بس بجد ضغط الشغل مسمحليش باي تدوين نهائي
التاج ده عايز مني اهم 6 اسرار فى حياتي ربما لن يكتشفها الغرباء او زي ما بيقولوا الى بيقابلوني اول مرة
وكان مررهولي صديقي هشام صادق في تعليق سابق له وده اول تاج ليا في المدونة هنا :) …
قوانين التاج :-
- توضيح اسم المدون الى مررلي التاج (هشام صادق) .
- توضيح قواعد التاج ( بوضحها اهو ولا انا بلعب يعني ) .
- اتكلم عن اهم 6 اسرار في حياتي ربما لن يكتشفها الغرباء ( وده الي هيحصل دلوقتي ) .
- امرر التاج ل 6 مدونين مع ذكر اساميهم وروابط مدوناتهم ( يا سلام من عنيا الاتنين ) .
- اترك تعليق فى المدونة الى همررلها التاج ( عز الطلب ) .
اهم 6 اسرار فى حياتي الغرباء ممكن مش يلاحظهوم فيها :-
- عصبي جدا لدرجة صعبة يعني ..
- متسرع احيانا فى اتخاذ القرارات او انتظار نتائج شئ معين ..
- خجول جدا وخصوصا عند التعامل مع الجنس الناعم وجها لوجه ايا كان السن او صلة القرابة ..
- بسمع اغاني كتير أووفر وربنا يهديني و ناس كتير بيكونوا واخدين عني فكرة غير كده خالص ..
- اجتماعي جدا انا مش بشكر فى نفسي بس انا بقول كده من منطلق اني بحب اكون صداقات كتير واتعرف على ناس وخصوصا لو كانوا اكبر مني سنا او خبرة فى مجالي ..
- مصدعاتي ودي بيتخدع ناس كتير فيا ويفتكروني هادي وفى حالي لكن انا غير كده خالص انا بعمل ارقام قياسية فى عدد الكلمات فى الثانية الواحدة بس مش عايز اخش موسوعة جنيس اصلي مش بحب اتصور وكده واطلع فى ال TV بقي وانتوا فاهمين ..
اكيد طبعا سكتم بكتم زي منتوا شايفين فى اول التدوينة يعني هششش ومحدش يطلع الكلام ده بره 
..
6 مدونين همررلهم التاج :-
- كريم ..
- احمد (مبرمج حر ) ..
- مروان عبد الناصر ..
- مصطفي محمد ..
- رشا نور الدين ..
- نوري ( رومانسية بالمايونيز) ..
وهروح دلوقتي ازورهم واعلق عندهم دي اوامر التاج ولابد من التنفيذ …..
وبعدها هرجعلكوا تاني هنا علشان اكتب عن الاجازة بقي الى جريت فريررررررررة …….
القواعد الأساسية لكل من يرغب بالعمل كمصمم / مبرمج مستقل
أضيف بواسطة Hawyphp في قسم Customers, General, Web, PHP
اضغط على الصورة لرؤيتها بحجمها الطبيعي
من فترة اعطاني احد اصدقائي ( مصطفي حسان ) رابط لمقالة اكثر من رائعة عن القواعد الاساسية للعاملين فى مجال الويب المستقل Freelancers كالمبرمج والمصمم المستقلين .. هذه المقالة تتكون من
ظهرت النتيجة المؤلمة وبدات الاجازة وخدنا الكاس ..
أضيف بواسطة Hawyphp في قسم Zamalek, General, MySchool, Personal
خلصت امتحانات من يوم 21 مايو وفضلت فى ترقب للنتيجة ، صحيح مكنش فى تفاؤل نهائي وكان شعوري اني هخرج بره العشرة الاوئل لكن الحمد لله ربنا ستر وحصلت على الثامن عالدفعة 94% .. اتصدمت فعلا .. صحيح الصدمة مش كبيرة لاني كنت التامن الترم الاول بردو .. بس زعلت اوي لاني لاول مرة فى حياتي الدراسية اكون خارج اول 3 .. المسالة مش مسالة المركز .. لكن هو تعود ان الواحد دايما يبقي على منصة التكريم فى بداية كل سنة جديدة ..
اعترف اني قصرت فى حق مذاكرتي والبداية كانت من الترم الاول تقريبا كانوا 4 او 5 ايام مذاكرتش حاجة قبل اخر خمس امتحانات علشان كنت بعمل سكربت بسيط لواحد زميلي لان هارد اللاب بتاعه كان اتحرق وكان لازم يصلحه والحمد لله عملنا السكربت واشترينا هارد لكن للاسف انا مذاكرتش كويس ومنمتش كويس و طلعت التامن الترم الاول .. قولت ان شاء الله هعوض الترم التاني ولسه فى اعمال سنة ..
جيه الترم التاني وذاكرت .. والله ذاكرت .. لكن جيت عالامتحانات وكان فى شغل بخلص فيه علشان ان شاء الله هيكون موقع كبير وللاسف جيت على مذاكرتي تاني مرة مع اني الحمد لله درجاتي عالية جدا فى المواد الخاصة بالفهم زي الرياضة والمنظومات والبرمجة (العملي ) لان النظري مليانة كلام نظري حفظ فنزلت فيها شوية وبعض المواد النظري التي تحتاج لحفظ اكثر من الفهم وحفظ بدون فهم مينفعش …
طبعا الحمد لله علي كل شئ والحمد لله اني مخرجتش بره العشرة الاوائل ، وان شاء الله التخصص هيبدا من السنة الجاية (رابعة وخامسة) وان شاء الله ناوي ادخل تخصص برمجة لان الشبكات كلها حفظ والمنظومات مشروع تخرجها صعب ودراستها رخمة ، لكن انا والبرمجة حبايب ان شاء الله ومشروعها هيبقي بسبوسة 
بدات الاجازة .. الاجازة دي بالذات هتحدد حاجات كتير بالنسبة ليا فى الفترة الى جاية .. والحمد لله انا ابتديتها صح وان شاء الله اكمل على نفس الطريق .. وان شاء الله انا لسه على وعدي بمفاجاة فى الاجازة بس لسه شوية لاني بجد مضغوط جدا .. شغل و مذاكرة C,C++ علشان ناوي ادخل الاولمبياد ان شاء الله .. دعواتكم بقي ..
بجانب التركيز فى الشغل و الاولمبياد .. الي بردو نفسي احققه فى الاجازة اني ابطل اسمع اغاني واحفظ قران بجد ،، العب شوية رياضة ،، اقلل من وقت قعادي عالجهاز .. انا بجد بتدمر .. عنيا بقت بتشجع الاهلي و ضهري بقي بيشرب من النيل ،، ونفسي مزعلش والدي ووالدتي واخواتي مني بجد ،، ونفسي ارجع زي زمان بقرا كتب بس مش كتب من عالنت - نفسي بجد ارجع زي زمان لهواية القراءة للكتب وتاليف القصص القصيرة .. يااااااااااه من اكتر من 7 سنين مكتبتش قصص قصيرة ولا اشعار .. الكمبيوتر قتل الهوايات دي خالص .. ان شاء الله احاول مع انه صعب ارجعها جزئيا ..
الهدف من كتابتي للجزء الخاص باهداف الاجازة .. علشان فى اخر الاجازة اشوف انا حققت ايه منها
اضغط على الصورة لتكبيرها
الحمد لله الزمالك حصل على بطولة الكاس ، انا كنت فى الاستاد والحمد لله شاركت فى احلي دخلة حصلت فى تاريخ الكرة المصرية وهي كتابة كلمة ( ” يارب الكاس ” ) بحروف عربية بالجلاد على الكورفا كلها والى اشترك فيها كل الجمهور وكان منظر مشرف لاحسن جماهير فى مصر امام حضور عدد من جماهير التراس (جهلاوي ) الى مش عارف جايين ليه .. الماتش مش ماتشهم وبردو جايين .. ورجعوا بخفي حنين ..
الحمد لله ربنا كان معانا واستجاب لدعاؤنا ومكنش ينفع الناس دي تروح زعلانة
Forza Zamalek .. Forza White Knights
إنطلاق مجتمع أبونتو العربي
أضيف بواسطة Hawyphp في قسم linux, ubuntu, My Friends, Technology, Web, Personal
الحمد لله تم انطلاق مجتمع اوبنتو العربي فى صورته الاولي
احد مؤسسي المجتمع هو صديقي العزيز واخي الكبير احمد تهامي ، ادعو الله ان يوفقه فى هذا المشروع
وهذه رسالتة لمجموعة EgyptWeb للاعلان عن انطلاق الموقع بشكل رسمي
الحمد لله والشكر لله من قبل ومن بعد ..
اطلقنا منذ قليل مجتمع أوبونتو العربي ..
الموقع فى شكله الحالي هو نواه لمجتمع عربي خاص بأوبونتو ..نحاول جاهدين ان نصل لأفضل تقديم ممكن للمحتوى ليخدم الشرحة العريضة من
القراء المهتمين بالنظام إن شاء الله ..:: أحمد تهامي ::
لقاء مع حبيب حداد بسوالف سوفت
أضيف بواسطة Hawyphp في قسم My Friends, Technology, Web
يوم الاربعاء الموافق 14 من شهر مايو سيعقد لقاء فى سوالف سوفت مع حبيب حداد مؤسس موقع Yamli.com
وحبيت انوه عنه لانه هيبقي لقاء مهم ان شاء الله ، وانا كنت كتبت قبل كده عن الموقع وعن فكرته
والحمد لله الموقع الان فى تطور مستمر من مؤسسه الاستاذ حبيب حداد
الدهشة الأولي
أضيف بواسطة Hawyphp في قسم My Friends, General
الدهشة الاولي
ديوان شعري جديد يصدر قريبا .. تحت الطبع للكاتب عمرو صبحي
الف مبروك يا عمرو وربنا يوفقك
مذاكرة وشغل وحــر وانفلونزا
أضيف بواسطة Hawyphp في قسم MySchool, Personal
السلام عليكم ،،
وحشتوني و وحشني التدوين جدا بس معلش هي ظروف المذاكرة والشغل وان شاء الله بعد الامتحانات الوضع يتغير
وهيكون فى مفاجأة قوية ان شاء الله بعد الامتحانات انتظروها مني ..
بكتب تحت ظروف نفسية و صحية سيئة جدا فالتمس منكم تدعوا لي بجد ده غير اني داخل على امتحانات
اخر السنة فى الثالث من مايو لمدة اسبوعين متواصلين وبحاول احسن من ترتيبي السئ (9) ، دعواتكم ..
أكبر موقع لرسول الله
أضيف بواسطة Hawyphp في قسم Islamic, Web
تم الانتهاء من أكبر موقع لرسول الله
سم الله الرحمن الرحيم
يقول الله عز وجل فى كتابه العزيز :
﴿لَقَدْ جاءَكُمْ رَسُولٌ مِنْ أَنْفُسِكُمْ عَزِيزٌ عَلَيْهِ ما عَنِتُّمْ حَرِيصٌ عَلَيْكُمْ بِالْمُؤْمِنِينَ رَؤُوفٌ رَحِيمٌ﴾
- ( التوبة: 128 ).
يالها من كلمات بديعة من رب العزة يخاطب بها القلوب المؤمنه
وياله من تقديم وتعريف رائع برسوله الكريم ووصفه الجميل بأنه من أنفسكم , وعزيز وحريص ورؤوف ورحيم
ما أبدع كلمات الخالق وماأبلغها من صفات للحبيب المصطفى عليه أفضل الصلاة والسلام
فكيف لانحبه وكيف لايدخل قلوبنا ويستقر ويكون أحب الينا من الدنيا ومافيها
فكيف لانلتمس من هذه المحبه ونسير على خطاه ونهتدى بهديه صلى الله عليه وسلم .
الحمد لله بكرمه و فضله تم الإنتهاء من موقع رسول الله
http://www.rasoulallah.net/index.asp
مميزات الموقع
وصلت TE Data يا بشـررر
أضيف بواسطة Hawyphp في قسم Internet Connection, Personal
فرحان جدا لعودتي الى الانترنت من منزلي وبعد معاناة مشكلة الخط الفايبر وتحويله لنحاسي تم بحمد الله توصيل الخط واصبحت Te Datawwwwy (تي اي داتاوووووي ) والحمد لله النت شغال زي الفل صحيح مش ثابت لكن هما قالوا ان فى ظرف كام يوم السرعة هتثبت وهيبقي تمام
النت قرب يبقي زي المية والهوا من غيره هتبقي العملية صعبة خالص وخصوصا للويب ديفليوبرز الى زي حالاتي
المعرض كان رائع Cairo ICT 2008
أضيف بواسطة Hawyphp في قسم Cairo ICT 2008, Technology, Egypt, Web, Personal
Hawy PHP @ Cairo ICT 2008
روحت المعرض مع بعض عناصر حركة Egypt Web وبصراحة كان معرض رائع جدا والحمد لله تجولته كله واستفدت كتير خصوصا من صاحب موقع الخوارزمي راجل عبقري فعلا ، والحمد لله قابلنا مبرمجين لعبة ابو حديد وخدنا صورة معاهم كمان وشوفت افكار جديدة زي موقع 2findme وموقع مدرستي . نت وحفص لتحفيظ القران كان جامد جدا وحصل مواقف كتير طريفة فى المعرض هذكر منها احد المواقف الطريفة فعلا
الوندوز هنج فى جناح مايكروسوفت
اه والله الوندوز هنج فى جناح مايكروسوفت الى كان صغير جدا ومركز على الوندوز لايف بس وخدماته زي الحسابات والمدونات (Live Spaces) والراجل وهو بيعمل حساب لاحد الزوار فؤجنا بالوندوز يهنج وطبعا استخدم الTask Manager علشان يحل المشكلة ولكنه فشل ايضا واضطر الى اعادة تشغيل الجهاز يدويا
كتب ايضا عن هذه الواقعة
