Cairo ICT 2008
أضيف بواسطة Hawyphp في قسم Cairo ICT 2008, Technology, Egypt, Web
سمعت ناس كتير شكرت فى المعرض وخصوصا السنة الى فاتت والحمد لله عرفت إزاى اسجل فى الموقع للحضور من اول يوم عن طريق احمد ابو النصر ، ادخل هنا علشان تقدر تسجل وتستلم الدعوة الى تقدر بيها تحضر من اول يوم
المعرض هيكون فى الفترة من 24-27 فبراير ان شاء الله وعلشان تحضر اول يوم لازم تكون معاك دعوة او مسجل من الرابط الى فوق
وان شاء الله مجموعة Egypt Web هتتجمع امام البوابة الساعة 9.30 اول يوم علشان ندخل المعرض مع بعض
المجموعة دي فيها احمد تهامي و حازم خالد و احمد توفيق و احمد ابو النصر وناس تانية علشان مكونش نسيت حد
حازم خالد كان كتب تدوينة عن المعرض فى 2007 —> Cairo ICT 2007
وان شاء الله كلنا نستفيد من الحدث الرائع ده ..
عودة الدراسة ، انقطاع الانترنت فى المنزل
أضيف بواسطة Hawyphp في قسم Internet Connection, MySchool, Personalالسلام علكيم ورحمة الله وبركاته
رجعت الدراسة (الترم التاني) وطبعا للي ميعرفش انا فى مدرسة داخلي يعني بسافر السبت وبرجع الخميس والوقت هيكون ضيق لكن ان شاء الله هحاول احافظ على التدوين فى اول الترم كده علشان نبقي فاضيين فى الامتحانات علشان اقدر اعوض النتيجة المحزنة دي (الثامن على الدفعة ) 
فدعواتكم معانا
خبر تاني عندي اني فصلت الانترنت من الشبكة الي كنت موصل منها ، وده بسبب حدوث سوء تفاهم بيني وبين صاحب الشبكة لبطء الانترنت وايضا كان عندي شغل لازم يترفع فاضطريت افصل واوصل من واحد تاني لكن ربنا عاقبني ان التاني كمان كان فاصل فلجأت للتعاقد مع تي اي داتا TE Data وان شاء الله هيكون بيني وبين مجموعة اصحابي وان شاء الله ميفصلش فدعواتكم بردو
خبر تالت
اني لازم اقوم حالا لاني فى سايبر جنب المدرسة الان ، لكن ان شاء الله اني قريب هكمل كتابة فى اقرب فرصة ان شاء الله ومواضيع مفيدة باذن الله ..
استودعكم الله 
الفيس بوك تنشئ مكتبة للتطبيقات بالجافا سكربت
أضيف بواسطة Hawyphp في قسم Web, Facebookفى خطوة جريئة وغير متوقعة فى يوم الجمعة اطلقت الفيس بوك نسخة تجريبية من مكتبة لتطبيقات الفيس بوك قائمة على الجافا سكربت وتمكن المطورين من انشاء التطبيقات المتكاملة باستخدامها بدون وجود اكواد لاي من اللغات القائمة على السرفر [Server Side Scripting] زي البي اتش بي يعني مجرد تطبيقات فى صفحات HTML وباستخدام الجافا سكربت وبكده هيبقي سهل جدا عمل تطبيقات باستخدام الاجاكس طبعا
الاهم انهم خلوا فى امكانية للمستخدم من انه يدخل التطبيق عن طريق موقع صاحب التطبيق بدون الحاجة للدخول لاطار الفيس بوك لتشغيل التطبيق وطبعا هيقدر يستغل كل خواص ال API الخاصة بالفيس بوك .
و هتبقي نفس الطرق المستخدم للحصول على البيانات من الكلاينت بتاع البي اتش بي زي اى كلاينت تاني
يعني نفس الوسائل المستخدمة للحصول مثلا على قائمة الاصدقاء او المجموعات او التنبيهات وطبعا بقي مع تغيير المعطيات عاوز مثلا اخر 10 اصدقاء عاوز الناس الى مضافتش التطبيق ، عاوز الاصدقاء الى من مصر بس ولا حتي من بلاد الواء الواء
ماعدا حاجتين لغاية دلوقتي مش بيدعهم الكلاينت ده :
- الAPI بتاعت رفع الصور مش متاحة ، طبعا رخمة شوية وخصوصا للتطبيقات الى هيبقي فيها تسويق وبيع وشراء لان المستخدم محتاج يرفع صورة المنتج الى هيبيعه فى التطبيق ده ، لكن طبعا الى متضايق يروح يكمل التطبيق بكلاينت البي اتش بي
- خاصية الprofile_setFBML هتبقي مسئولة عن عرض الويدجت بتاعت التطبيق فى البروفايل وبس
فعلا خطوة جريئة وكبيرة جدا وهتسهل من تطوير تطبيقات الفيس بوك الى انتشرت جدا الاونة الاخيرة ، ده غير اتاحة تشغيلها على المواقع بشكل منفصل ..
مصادر
// اثناء كتابتي للتدوينة وجدت تدوينة لاستاذ احمد جبر Gadgets Arabia يتحدث عنها (بارك الله فيه ) .
تجاهل الدعوات المزعجة كلها مرة واحدة فى الفيس بوك
أضيف بواسطة Hawyphp في قسم Web, Facebook, Personalاوقات كثيرة تجد فوضي عندك فى صفحة الدعوات لاضافة تطبيقات فى الفيس بوك ، و بتبقي مخنوق انك تدخل الصفحة دي من الزحمة الى فيها 
، طبعا ده مش مع كل الناس لكن انا من الى كانوا بيواجهوا المشكلة دي بوافق على الحاجات الى انا عاوزها وبسيب الباقي علشان اقعد اعمل ليهم اجنور واحدة واحدة وبتبقي عملية مملة
المهم بعد الرغي ده كله ،في واحد عمل اداة عبارة عن بوكمارك بتضيفه عندك وتدوس عليه وانت فاتح الصفحة بتاعت الدعوات وهووو با تلاقي كل الدعوات اتعملها اجنور ما عدا دعوات الجروبات والاصدقاء دول بقي اعملهم انت يدوي 
شوف الفيديو ده وان شاء الله تلقط اى حاجة
هاا ؟؟ ايه الاخبار
حاجة سهلة خالص هتدخل الموقع ده WwW.Ignoreall.CoM وهتلاقي لينك كبير زي ما كان فى الفيديو كده
يا اما تسحبه على شريط المفضلات عندك او تدوس عليه كليك يمين وتختار Add to bookmarks/favorites
وبعد كده تروح على الدعوات وتأكد ان مافيش ولا تطبيق من دول انت محتاجه وهتعملهم اجنور خلاص واطلع على البوكمارك الى انت ضيفته من شوية ودووووووس وفى ثواني هتلاقي الصفحة فرفشت خالص وانت فرفشت وبس 
المهم ان عبقرينو صاحب موقع IgnoreAll كاتب فى الفوتر بتاع الموقع :
ان الاداة دي مش مرتبطة بادارة الفيس بوك يعني من الاخر مش خاصة بيهم ولا هو واخد اذن منهم وممكن متشغلش لو هما غيروا اى حاجة بس هو ساعتها ممكن يعمل غيرها
مصادر
إنتهت الامتحانات … و ظهرت النتيجة !!
أضيف بواسطة Hawyphp في قسم MySchool, Personalالسلام عليكم ورحمة الله وبركاته
عاملين ايه يا جماعة ، ان شاء الله تكونوا بخير والى بيمتحنوا يكونوا خلصوا ونجحوا واتعشوا وناموا
انهيت امتحاناتي يوم الاربعاء السابق ولكن لم اريد ان ادون الا لما اعرف النتيجة [3114] الى ظهرت اليوم واللي طلعت مخيبة للامال لاول مرة منذ دخولي المدرسة ، فى الصف الاول كنت الثالث ( ترم اول وترم تاني ) ، وفى الصف الثاني كنت الثاني ( ترم اول وترم تاني ) ، اما فى الصف الثالث ففي الترم الاول الى هو الترم ده انحدرت الى التاسع او نقدر نقول الثامن بمجموع [389.5/420] علشان فى اتنين مكررين فوق ، طبعا كانت مأساة بالنسبة ليا ولكن الحمد لله على كل شئ فانا درجاتي مش وحشة بردو ومقفل مواد كتير ونظرا لإن كان فى ظروف صعبة مريت بيها فترة الامتحانات واستهتاري بالعربي والانجليزي بس الحمد لله كثيرا على الدرجة دي وان شاء الله اقدر اعوض فى الترم التاني وخصوصا اعمال السنة لسه متضافتش للمجموع وربنا يكرم ان شاء الله ، وطبعا مش هوصيكم فى الدعاء بقي اديكم شايفين ..
وان شاء الله المدونة هترجع للنشاط من تاني باذن الله فترة الاجازة دي ، هخلع انا بقي علشان ماتش مصر والسوداااااان
موقع الخوارزميات العربية
أضيف بواسطة Hawyphp في قسم Programming, Algorithms, Web, ++Cالسلام عليكم ورحمة الله وبركاته
غدا امتحاناتي تبدا وقد قلت فى التدوينة السابقة عن توقف مؤقت ولكن اجبرني هذا الموقع على كتابة هذه التدوينة
انا مش هتكلم انا هجيبلكوا كلام صاحب الموقع وهو اكيد اكتر واحد يقدر يتكلم عن موقعه
بسم الله الرحمن الرحيم
كلنا نعرف أن المنتديات تغوص بعمق في روتين مميت قد يكون سببا في تأخر قدراتنا البرمجية لذاوجب التفكير في طريقة نحرك بها ادمغتنا برمجيا و التفكير بطريقة منطقية و الخروج من مستنقعات قواعد البيانات و لو للحظات و أيضا لنعرف هل نحن فعلا مبرمجين أم لا ، لذا قمت بتطوير موقع “مسابقات الخوارزميات العربية” الموقع الذي فيه يكون التنافس على أشده بين المبرمجين و نظام هذا الموقع هو كالتالي :
كل فترة يتم افتتاح مسابقة اما تحت رعاية موقع او منتدى آخر يريد كسر روتينه و عمل مسابقة لمرتاديه أو مسابقة اقوم بطرحها شخصيا و كل مسابقة تحتوي على عدد معين من الخوارزميات (ثلاث خوارزميات كأقصى حد) و كل خوارزمية تكون بمستوى صعوبة من1 الى 3. من أجل المشاركة في أي مسابقة يجب على المتباري أولا التسجيل في الموقع و المسابقة يمكن أن تمتد الى غاية أسبوع، لكن حالما يطلع المتباري على أي خوارزمية من المسابقة يبدأ العد العكسي حيث أن الخوارزمية من المستوى 1 أقصى عدد نقاط فيها هو 250 نقطة و الوقت المسموح لحلها هو نصف ساعة فاذا اجتاز المتباري النصف ساعة و كان جوابه خطأ يحصل على 0 نقطة اما اذا كان جوابه صحيحا فيحصل على 25 نقطة، اما اذا أجاب داخل النصف الساعة فيحصل على النقاط التي يستحقها و نفس الأمر بالنسبة لخوارزميات المستويات الأخر الا ان خوارزمية المستوى الثاني نقاطها 500 و مدتها 45 دقيقة و المستوى الثالث نقاطها 1000 و مدتها ساعة واحدة. الآن بعد مشاركة العضو فانه لا يستطيع تعديل كوده بأي حال من الأحوال و يقوم المشرفون بعد ذلك بتصحيح الاجابات تباعا. بعد انتهاء المسابقة يتم اغلاقها و طرح النتائج النهائية لمعرفة الفائز و ترتيب المبرمجين. وليس هذا كل هذا فبعد اغلاق المسابقة يتم فتح منتدى خاص بها في الموقع لمناقشة الصعوبات و أيضا كتابة تحليلات للخوارزميات التي طرحت في المسابقة ووضعها كمقالات في الموقع.
أتمنى ان تكون فكرة الموقع وصلت اليكم
وتقبلوا مني فائق الاحترامأيوب جمال الإدريسي
وده عنوان الموقع :
http://www.vbnetworld.com/Competition
Enjoy Ya Mooparmgeen
الامتحانات على الابواب >> توقف مؤقت
أضيف بواسطة Hawyphp في قسم MySchool, Personalالسلام عليكم ورحمة الله وبركاته ، ايه الاخبار كل سنة وانتم طيبين بمناسبة السنة الهجرية الجديدة اعادها الله علينا وعليكم باليمن والبركات 
ان شاء الله امتحانات نصف السنة عندي هتبدا من يوم السبت الى جاي وهتستمر لمدة اسبوعين ان شاء الله
يعني من الاخر كده ومن غير لف ودوران هتدعوااااا يعني هتدعواااا ( بس لي مش عليا طبعاً 
) ، وانا كمان هدعيلكوا .
وبسبب الامتحانات هيبقي فى شبه توقف عن التدوين ان شاء الله لكن لو فى اى فرصة فى الفترة دي انى ادون او لقيت حاجة مهمة ان شاء الله مش هتأخر عنها ، وان شاء الله العودة بعد الامتحانات تكون عودة قوية بس ادعولي بس لاني مذاكرتش حاجة وعندي اول امتحان نظري CNC 
واليوم الى بعدها علطول هيبقي نفس المادة عملي فدعواتكم يا جماعة مش هكرر الكلام ده تاني ، اديني قولت اهو وقد اعذر من انذر 
فى امان الله بقي ، وادعولي 
Abo7adeed Game
أضيف بواسطة Hawyphp في قسم Egypt, Gamesالسلام عليكم يا جماعة ، يارب تكونوا بخير علطول 
.jpg)
اضغط على الصورة لرؤيتها مكبرة
إنخش فى الموضوع علطول وهو ان فى مجموعة اقل ما يمكنني ان اقوله عليهم انهم عباقرة و طموحين 
فكروا فى انهم يعملوا احد المستحيلات الى كانت ممكن تحصل فى مصر وهي انتاج لعبة 3d- صنع فى مصر 
، طبعا العوامل كتيرة الى خلت حاجة زي كده مستحيلة وتبقي مفاجاة لما تتعمل ، بس الشباب دول اثبتوا ان مفيش مستحيل مع الطموح والارادة بالذات في مجال الكمبيوتر 
، اكيد واجهوا صعوبات فعلا 
وهتشوفوها واكيد مروا بتعليقات محبطة زي ( كان غيرك اشطر ) او ( يا عم سيب العيش لخبازه ) 
والله اعلم يمكن محدش احبطهم خالص بس فى نوع من الناس موراهاش غير ان تحبط اي حد فى اى حاجة عاوز يعملها
المهم طولت عليكم اوي ، معانا النهاردة موقع لعبة ابو حديد Abo7adeed 
( بوحة سابقا ) وسبب تغيير الاسم هنا هتعرفوا السبب وهتشوفوا اد ايه مفيش اى اهتمام بالافكار الجديدة فى البلد دي 
واتضايقت جدا من ردود على اصحاب اللعبة بانهم غلطوا فى اختيار شخصية اللعبة وانهم هايفين وتافهين طيب حتي اعرف هما اختارو الشخصية دي ليه ، الشخصية موجودة كتير فى مصر ولو شفت الفيلم هتفهم الى اقصده بعيدا عن بعض المواقف التافهة حقيقة فى الفيلم لكن انا بتكلم علي شخصية مصرية موجودة فى الحقيقة و محدش ينكر وجودها
الناس الى كانوا متضايقين من الفكرة انا بجد بتضايق منهم جدا حتي مش بيقترح شخصية تانية ، لا ده يقوم شاتم فى اللعبة والى عاملين اللعبة يعني اكيد انسان سلبي او عنده عقدة نفسية هي الى هتوديه فى داهية ده حتي مفكرش فى مجهود الناس الى عملوا حاجة كانت فعلا في يوم من المستحيلات المصرية الى ممكن تحصل
معاكوا ان اللعبة مش جامدة قوي ومش ومش بس شوفوا بدايات الالعاب بره كانت عاملة ازاي ، ده الحمد لله قوي ان في ناس وصلت للمستوي ده واكيد مع الاستمرار هيطلعوا الى احسن بس انتوا ادعموهم بس وان شاء الله تشوفوا لعب تكسر اللعب الامريكية الى بجد هي دي الى عيب علينا نمشي وراها
انا بحيي كل واحد بذل مجهود علشان اللعبة دي تطلع للنور وهي بردو لسه فى البداية بس بداية موفقة جدا جدا جدا وانا بجد نفسي انهم يكملوا وميخلوش حاجة تقف اودامهم وتقف اودام الصناعة المصرية الجديدة ( صناعة الالعاب )
والله وعملوها الرجالة بجد
روابط خاصة بالموضوع :
شريط فيس بوك للفايرفوكس - Facebook Toolbar for Firefox
أضيف بواسطة Hawyphp في قسم Firefox, Web, Facebookكل سنة وانتم طيبين وعيد سعيد عليكم كلكم ( اخبار اللحمة ايه 
)
النهاردة انا فرحان والله اني لقيت التوول بار ده الى هيوفر وقت كتير واكيد هيسهل العملية اكتر ان شاء الله
توول بار روووعة و شريط الاصدقاء الجانبي بجد … جاااامد
هو حاليا ل Firefox 2.0 بس اكيد هيتحدث ل 3 لما ينزل رسمي ان شاء الله
فى بعض المشاكل فى التوول بار بس انا متاكد ان شاء الله انه سيتم اصلاحها قريبا ،
دي شلة مارك زركربرغ يعني مش اى حد 
!! Yamli
أضيف بواسطة Hawyphp في قسم Technology, Programming, Webولا سحر ولا شعوذة - Wala Se7er Wala Sha3wza
Search the Arabic web, use English letters
ابحث بالعربي باستخدام الحروف الانجليزية
اوعوا تقولوا عليا مجنون ولا عندي حالة نفسية ولازم اروح العباسية ضروري
ادخل على ياملي - Yamli وشوف العجب بنفسك
انا هسيبك تعيش اللحظة وتجرب بنفسك ولو لسه مش فاهم الفكرة منه ادخل هنا
عالعموم الفكرة بسيطة خالص .. تسمع عن [ الفرانكو ] احد مسميات العربي الانجليزي الي بيبقي فيه مثلا حرف ال(ع) بيتكتب 3 وحرف ال(ح) بيتكتب 7 وهكذا طيب لو انت متعرفهاش او عارفها ومبتستخدمهاش يبقي ممكن ميهمكش الموضوع ده لكن فى ناس كتير مدمنة للغة المرووشة دي وخصوصا فى الشات وفى الرسائل SMS ده حتي فودافون كانت بتبعت رسايل عروض باللغة دي
المهم ان الموقع ده يا سيدي لغاية دلوقتي فيه خدمتين للغة
- 1- محرك بحث (جوجلي) بتكتب فيه باللغة دي وهو بيحولك الكلام عربي توماتيكي مع وجود اقتراحات بتساعدك فى سهولة ايجاد الكلمة المطلوبة
- 2- خدمة محرر نصي للغة دي لو انت بتستخدم اللغة دي فى رسايلك او اي حاجة فهيساعدك انك تنجز فى كتابتها بصورة شيقة جدا
وسبحان الله كل الجمال والحلاوة دي ولسه Beta ربنا يستر علينا لما يعدي الــبيتا
